O alumnado de 6º de Primaria participou esta mañá na xornada musical “O son da praza”, celebrada na Praza Maior de Ourense. Nesta iniciativa educativa e artística déronse cita máis de 400 nenos e nenas de diferentes centros escolares da cidade e da provincia.
O evento, promovido polo grupo de traballo do profesorado de música “Somos Música”, en colaboración co CFR de Ourense, ten como obxectivo poñer en valor a importancia da música nas aulas como ferramenta educativa, creativa e de convivencia.
Durante a mañá, o alumnado participante ofreceu diferentes actuacións musicais, entre as que se incluíron danzas, percusión corporal e cantos, convertendo a Praza Maior nun espazo de aprendizaxe, expresión artística e celebración compartida.
Desde o centro queremos felicitar ao noso alumnado pola súa participación, implicación e excelente comportamento ao longo desta experiencia tan enriquecedora.
